除夕當日還要上早班，收工趕住同大地之子屋企人食飯，食完飯又趕去奶奶朋友屋企睇煙花，匆匆忙忙咁踏入左2021。
2020年，全世界都受到疫症影響，法羅嘅人算比較幸運，疫症無其他地方嚴重，生活尚算正常。對我黎講，2020最大嘅挑戰仍然係做全職媽媽。燒賣開始識行識走識扭計，每日都係新挑戰，不過亦因為一日24小時都陪住燒賣，所以我無錯過佢所有第一次，第一次翻身、第一次爬行、第一次走路、第一次叫媽媽。然後，燒賣終於上托兒所，我可以由全職媽媽轉返做全職工作。
喺搵工上，我亦遇到好多難關，一係無回音，一係被拒絕。然後誤打誤撞喺魚工廠返左個幾月，到而家終於搵到份麵包店嘅全職工作。你問我鍾唔鍾意份工，老實講，唔會係我嘅夢想工作，但喺呢個時候，搵到全職工作我已經好感恩，而且呢份工畀我好多機會練習法羅文，同埋返早班，1點收工仲可以陪燒賣，重點又有麵包攞返屋企🤣🤣🤣
2020縱有無數次沮喪嘅時候，可幸嘅係大地之子都喺我身邊。奶奶喺除夕夜幫我地影左張合照，然後我諗起5年前佢都喺同一張梳化幫我地影過合照。從照片所見，我地都滄桑左唔少，歲月無情呀～～每條皺紋都代表每個燒賣午夜狂呼嘅無眠夜。
2021年，沒有什麼驚天地泣鬼神嘅新年願望，可跟大地之子 安躺於家裏便覺最寫意。希望疫症快快走，可以開始我嘅夢想導遊工作。燒賣快高長大，聽聽話話。完。
Search